Thucin Thutang..

• Itna man taktak i ngah nop leh itna man taktak tuhkhia masa ni.
• Itna pen kicingta cih om ngei lo ahih manin, itna i hawmkhiat ding thasial kei ni.
• I kisaktheihpih ding pen "Ei thu" hi lo a, Jesu thu ahi hi.
• I guallelh hun a i thanem pen i khial kei hi. Ahi zongin i guallelh huna i lungkiat pen i khialna lianpi hi.
• Itna i neih theih kei leh, Pasian tawh kipawl lo cihna hi pah hi. Bang hang hiam cih leh Pasian pen itna Pasian ahi hi.
• I lungkham hun leh i dah/kah hunin, Topa bek mah ci ni. Lungnopna khamuanna leh daihna taktak pen, Topa' kiang pan bekin hong pai hi.
• I hoihna tawmno khatte i kisaktheihpih a, i siatna tampi takte hangin i maizum thei kei se hi.
• I pil i siamna leh i hauhnate Topa' minthan' gamzai nadingin zatsiam ni. Tua bang mite' tung bek mahah thupha kip ding hi.
• I kibat lohna tampitakte gawmkhop siam peuh leeng, melkibanglo Sakhituihuup bang mahin etlawm in, aw' kibanglo guiter khaute bangin mite'n i hihna khempeuh zaknop, muh nop hong sa ding uh hi.
• I pianthak ma-in, siatna tampi i bawl kha mah ding hi. I pianthak khit ciangin siatna tawh kikhen liuleu ding pen Topa deihna hi. Kisin ni.
• I hancimnate a mawkna suak ngei lo a, i thadahnate a mawkna mah hong suak takpi hi.
• I pumpi kisapna(gilkial, dangtaak, natna,etc…)tel takin i theih mah bangin, i kha adinga akisam te zong tel takin i theih ding kisam hi.
• I nuntakna lungngai pha kikin, i hoih lohnate kipuahpha in, i hoihna om sunsunte zom toto ni.
• I kicin'lohna tampitakte' tungah kinga loin, a kicing itna anei Pasian tungah kinga zaw ni.
• I khutniin leh i ut bangin i zat ngam loh mah bangin, i lungsim leh i gamtatnate a nit ciangin, Pasian in a ut bangin hong zang thei lo hi.
• I geelna bangin hong piang pah lote pen, Pasian' geelna dang zong om thei ahih manin, lungkiat thanem pahpah ding hi lo hi.
• I nungah bangin hong delh in, i mai-ah bangin hong dal cihte thupi masa lo a, Pasian in hong ompih in hong makaih ding a thupi hi zaw hi.
• I lampi nuam den lo kha mah dinga, ahi zongin i lampi haksa den tuan lo ding hi. Topa tawh tonkhawm in lungkia kei ni.
• I khialh lamtak ei-le-ei iki theihna pen, i kipuahphat kik theih nading kal masa hi pah hi.
• I upna pan lam hong pialsak thei ding satan' vanzat khempeuh Jesu min tawh nial den ni.
• I kisap tampi om kha mah dinga, tuate sung panin i kisap lianpen in, Pasian ompihna leh ama lamlahna ahi hi.
• I san'sa Gupkhiatna Thu kip takin len ni.