Guallelhna leh Launa

Guallelhna in nang hong lehkaih hi lo in,

Guallelh ding lau man a, bangmah a sem lo hi zaw teh.

Nang tawh a ki bang a omkhop theih ding,

Kiim leh paam tawh ki tuak a gamtat theih na ding ,

Na muhna na ngaihsutna te leh na thukhun te sungah mite kai hi lo na hiam.

Thuman thudik tawh nungta inla,

Thuumthum kei in.

Mi khat peuhpeuh a hi zong, van khat peuhpeuh a hi zong,

Mawhsak in, gensia pah2 kei in.

Nasep khat peuh2 i sep ciang in, kisil ding a ki thawipa tawh I ki bang hi. Phalbi zing tung a kisil cih pen a baih vet lo khat hi. A hih hang tui keu khat ki buak khin le hang, nuam mahmah lel hi. I ki buak kik ding ki kihta nawn lo hi.

Mihing te nasepthak nasep lamdang khat sem ding hi le hang ki lau pian hi. I sep sung na ngawn in zong ki khawl thei hi. Banghang hiam? Khial kha leng cih ngaihsutna hong lut pah2 in, ki lau hi.

Mihing te pen a siamsa a suak kua mah om lo a hih man in sem phot le’ng, a dan2 khat om ding hi. A hih hang kuamah a khial nuam om lo, a khial ut lo mawk! Pawlkhat bang semnuam lo, buainuam lo in, a baih lam veive ngaihsun in a hih theihna te zang khia lo in hi ci om lel hi. Mihing te’ khuak pen zang kei leng kekseu thei hi.Veikhoi te bang a veilam uh tawh nasem a hih man in a taklam sang in, lian zaw,khauh zaw hi. Tua mah bang in takkhoi te zong a taklam uh tawh nasem uh a hihman in a veilam sang lian zaw, khauh zaw hi.Nasem nuam lo cih pen Pasian in deih lo hi. Mihing a I pian nak a leh ei tawh ki tuak na sep ding a hihi. Khut kim lo, khe kim lo te’n zong sem hi. Mit khuamu lo te’n zong te’n sem hi. Naupang, ulian, putek pitek te’n zong sem a mau tawh ki tuak na sem uh hi.

“Nasem lo in mawk nek hithiat ning, sem in khial kha leng vaisah zaw” ci in a tu hithiat pawl khat om lai zen hi. Ataktak in ci le hang nasep ding hamsa ngeungau a, lam kal a a dinkhawl te pen a guallel(အဆင္ေၿပ lo) hi lo in,a lau uh hi zaw hi.

Khial leng bang ci ding? I khialh ciangbang hih ding?

I khialh ciang in a ma hang hi, tua pa hang hi ci in mi mawh sak kha ken ni. Kei ma siam loh man a khial hi’ng ci in, khat vei hanciam kik lai in.

1302-1329 sung asem Scotland Kumpipa Bruce tangthu za ngei in ong um ing. Khatvei galtai in gamsung lobuk khat ah bu in, zan in lupna tung ah ong lum hi. Tua leh mompi khat bukzawl te khat leh khat tung ah a khau ong vial2 khat ong mu hi. A man zong hoihtak en in tua mompi in a khatveina vialphei in ngahlo hi, tua bang in gukvei ciang vial hi. Tua leh Bruce in zong ong ngaihsun in,”Ke’n Mangkang te ka do zawh gukvei hi ta, mompi bang in gualzawhna ngah zo lo hi’ng. Mompi in a sagihveina ong hanciam lai tam maw ci in hong en gige hi. Tua leh mompi in a khau khatvei ong vialh kik a leh ngah lian hi. Tua mah bang in a ma’n zong tha ong ngah in Mangkang te ong do kik hi. Tua a do kikna ah Mangkang te zo pah hi.

Tua a hih man in lelh ding lau kei inla, sep ding a ki lawmte sem in.